Həsən padşah Bayandur

XV əsrdə Azərbaycan ərazisində Ağqoyunlu dövləti mövcud olmuşdur. Bu dövlətin ən güclü hökmdarı Bayandur nəslindən olan Uzun Həsən — Həsən padşah idi. Uzun Həsən uzun sürən mübarizədən sonra rəqib Qaraqoyunlu dövlətini məğlub edərək bütün hakimiyyəti öz əlinə aldı və Təbriz şəhərini Ağqoyunlu dövlətinin paytaxtı elan etdi. O, mərkəzləşmiş, güclü bir dövlət qurmağa çalışırdı: ölkədə asayişi bərpa etmək, vergiləri nizama salmaq və məmurların özbaşınalığının qarşısını almaq üçün «Qanunnamə» adlanan qanun toplusu tərtib etdirdi; bu qanunlardan sonralar Osmanlı və Səfəvi dövlətləri də istifadə etmişdir. Uzun Həsən elm və mədəniyyətə də böyük diqqət yetirir, alim və sənətkarları himayə edirdi. Onun anası Sara xatun isə dövrünün məşhur diplomatlarından biri idi — mühüm siyasi məsələlərdə, o cümlədən Osmanlı sultanı ilə aparılan danışıqlarda fəal iştirak edirdi.