Milli operamızın banisi

Üzeyir Hacıbəyli Azərbaycan xalqının yetirdiyi ən dahi bəstəkarlardan biridir və o, təkcə Azərbaycanın deyil, bütün Şərqin — müsəlman dünyasının — professional musiqisinin və operasının banisi sayılır. 1885-ci ildə Ağcabədidə anadan olan Üzeyir bəy hələ gənc yaşlarından milli musiqi ilə Avropa musiqi ənənələrini birləşdirmək arzusunda idi. Bu arzusunu 1908-ci ildə həyata keçirdi: Məhəmməd Füzulinin məşhur əsəri əsasında yazdığı «Leyli və Məcnun» operası Bakıda səhnəyə qoyuldu və Şərqdə, bütün müsəlman aləmində yazılan İLK opera oldu. Bundan sonra o, xalqın gündəlik həyatını gülüş və musiqi ilə əks etdirən «O olmasın, bu olsun» (1910) və xüsusilə dünya şöhrəti qazanmış «Arşın mal alan» (1913) musiqili komediyalarını, daha sonra isə xalq qəhrəmanlığını tərənnüm edən «Koroğlu» (1937) operasını yaratdı. Üzeyir Hacıbəyli həm də Azərbaycan Dövlət Himninin musiqisinin müəllifidir. Onun yaratdığı əsərlər bu gün də Azərbaycan mədəniyyətinin ən qiymətli incilərindən sayılır və milli musiqi mədəniyyətinin əsasını təşkil edir.